Վարկի էական պայմանների վերաբերյալ հակիրճ ամփոփաթերթ, որը պարունակում է տվյալներ վարկի տարեկան փաստացի տոկոսադրույքի, տույժերի և տուգանքների, վճարումների և այլ կարևոր պայմանների մասին:

Սպառողի կողմից նշվող ծածկագիր, որը ֆինանսական կազմակերպությունները օգտագործում են սպառողին նույնականացնելու նպատակով:

Հստակ ժամկետով որոշակի պարբերականությամբ վճարվող (մարվող) հավասարաչափ գումարներ:

Ապահովագրական միջնորդ է, որը ներկայացնում է ապահովադրին, այսինքն ապահովադրի կողմից տրված լիազորությամբ հանդես է գալիս նրա անունից և հանձնարարությամբ:

Ապահովագրական միջնորդ է, որը ներկայացնում է ապահովագրական ընկերությունը, այսինքն հանդես է գալիս նրա անունից և հանձնարարությամբ:

Այն ընկերությունն է, որ կազմակերպում է ապահովագրության գործընթացը:

Ապահովագրական հատուցումը ապահովագրական պատահարի տեղի ունենալու արդյունքում ապահովագրողի կողմից ապահովադրին կամ շահառուին վճարման ենթակա գումարն է:

Ապահովագրական միջնորդը օժանդակում է ապահովադիրների և ապահովագրողների ապահովագրական հարաբերությունների հաստատմանը: Ապահովագրական միջնորդներ են ապահովագրական գործակալը և ապահովագրական բրոքերը:

Ապահովագրական պատահարն այն դեպքն է կամ իրադարձությունը, որի տեղի ունենալու դեպքում ապահովագրողը պարտավորվում է ապահովադրին կամ շահառուին տրամադրել ապահովագրական հատուցում:

Ապահովագրական պատահարի վրա հասնելու կամ դրա հետևանքով վնաս կրելու հավանականությունն է:

Ապահովագրողի կողմից տրված փաստաթուղթ, որը հավաստում է ապահովագրության պայմանագրի գոյությունը և պարունակում է դրա պայմանները:

Ապահովագրական օբյեկտն ապահովագրման ենթակա գույքային և անձնական շահերն են:

Ապահովագրական պայմանագրով սահմանված չափով և պայմաններով ապահովադրի կողմից ապահովագրողին վճարվելիք գումարն է:

Ապահովագրության պայմանագիրը կնքված գրավոր համաձայնություն է ապահովագրողի և ապահովադրի միջև, որը սահմանում է նրանց միջև հարաբերությունները ապահովագրության վերաբերյալ: Պայմանագրի ուժով է, որ ապահովադիրը պարտավորվում է վճարել ապահովագրավճար, իսկ պատահարի առաջացման դեպքում ապահովագրողը պարտավորվում է վճարել ապահովագրական հատուցում:

Ապահովագրողը ապահովագրական ընկերությունն է, որ կազմակերպում է ապահովագրության գործընթացը: Համաձայն «Ապահովագրության և ապահովագրական գործունեության մասին» ՀՀ օրենքի՝ Ապահովագրական ընկերությունը ապահովագրական գործունեության լիցենզիա ունեցող իրավաբանական անձն է:

Ապահովագրված անձն այն անձն է, որի համար կնքվում է ապահովագրական պայմանագիրը և որի հետ կապված ապահովագրական պատահարի առաջացումն է ապահովագրության պայմանագրի առարկան:

Ապահովադիրը ապահովագրական ընկերության հետ ապահովագրական պայմանագիր կնքող անձն է:

Ավտոտրանսպորտային միջոցների օգտագործումից բխող պատասխանատվության պարտադիր ապահովագրություն:

Կենտրոնական բանկի կողմից լիցենզավորվող ֆինանսական կազմակերպություն է, որի նպատակը շահույթ ապահովելն է` ավանդներ ընդունելու և վարկեր տրամադրելու միջոցով: Բանկերը իրականացնում են նաև արտարժույթի փոխանակում, տրամադրում են անհատական պահատեղեր թանկարժեք իրերը և փաստաթղթերը ապահով տեղում պահելու համար, միջնորդում են արժեթղթեր գնելու և վաճառելու բրոքերային ծառայություններ և այլն:

Այն գումարն է, որը ավանդատուն ներդնում է բանկում, իսկ բանկը պարտավորվում է վերադարձնել ներդրված գումարը և պայմանագրով նախատեսված կարգով և պայմաններով դրա դիմաց վճարել տոկոսներ:

Այն անձն է, որը ներդնում է ավանդ բանկում:

Որևէ երկրի փողային միավոր, որը այդ երկրի տարածքում համարվում է օրինական վճարամիջոց:

Այլ երկրի ազգային արժույթը:

Ավանդի պայմանագիրը կնքված գրավոր համաձայնություն է բանկի և ավանդատուի միջև, որով բանկը, ընդունելով ավանդատուից կամ ի օգուտ ավանդատուի մեկ այլ անձից ստացված ավանդը, պարտավորվում է ավանդատուին վերադարձնել ինչպես ավանդի գումարը, այնպես էլ պայմանագրով սահմանված կարգով և պայմաններով տոկոսներ վճարել դրա դիմաց:

Ավանդի տարեկան տոկոսային եկամտաբերությունը ցույց է տալիս, թե որքան կկազմի ներդրված ավանդի տարեկան եկամտաբերությունը` ավանդատուի կողմից ավանդի հետ կապված պարտադիր վճարներ կատարելու և ավանդից ստացված տոկոսագումարները ներդրած ավանդի մայր գումարին ավելացնելու արդյունքում:

Բաժնետոմս, որը նրա տիրոջը առաջնահերթ իրավունք է տալիս ստանալու հաստատագրված շահաբաժին (դիվիդենտ), սակայն միևնույն ժամանակ իրավունք չի տալիս մասնակցելու բաժնետերերի ընդհանուր ժողովին և ընկերության կառավարման կապակցությամբ որոշումներ կայացնել: Ի տարբերություն հասարակ բաժնետոմսերի, արտոնյալ բաժնետոմսերը ունեն պահանջների գերադասելի իրավունք: Հասարակ բաժնետոմսերի տերերը չեն կարող շահաբաժին ստանալ, քանի դեռ արտոնյալ բաժնետոմսերի շահաբաժինները լրիվ վճարված չեն:

Արժեթուղթ, որը հավաստում է դրա տիրոջ (բաժնետիրոջ) կողմից բաժնետիրական ընկերությունից շահաբաժին ստանալու և/կամ ընկերության գործերի կառավարմանը մասնակցելու և դրա լուծարումից մաս ստանալու իրավունքը:

Իրավաբանական անձ է, որը տրված լիցենզիայի հիման վրա ներգրավում է ավանդներ և իր անունից և ռիսկով տեղեբաշխում է դրանք վարկեր, ավանդներ, դեպոզիտներ:

Բանկում համապատասխան պայմանագրով հաճախորդի բացված հաշիվն է, որի միջոցով իրականցվում են գումարի մուտքագրումներ, փոխանցումներ, կանխիկացումներ և այլ ֆինանսական գործառնություններ:

Բանկոմատը մի սարքավորում է, որով իրականացվում է փողի կանխիկացում և ծառայությունների դիմաց վճարումներ: Բանկոմատը հնարավորություն է տալիս վճարային քարտի միջոցով և PIN կոդի (անձնական ծածկագիր) ստուգմամբ կատարել հետևյալ գործառնությունները` • կանխիկի ստացում, • մնացորդի հարցում, • վճարումների կատարում (կոմունալ վճարումների կատարում, հեռախոսի կամ ինտերնետ քարտի լիցքավորում)։ Որոշ բանկերի բանկոմատների միջոցով հնարավոր է նաև` • կատարել փոխանցումներ, • տպել քաղվածք:

Տոկոսային ցուցանիշ, որ յուրաքանչյուր անգամ հաշվարկվում է մայր գումարի և նախկինում հաշվարկված տոկոսների գումարի ամբողջության նկատմամբ: Օրինակ` եթե 1000 դրամ ավանդ ներդնեք 10%-ով, ապա 1-ին տարում կստանաք 100 դրամ, իսկ երկրորդ տարում` 1100 + 1100 x 10%=1210 դրամ, երրորդ տարում տոկոսագումարը կհաշվարկվի 1210 դրամի նկատմամբ և այդպես շարունակ:

Առևտրի ձև, որը հիմնականում տեղի է ունենում ապրանքափոխանակության ձևով, այսինքն ապրանքի դիմաց վճարում կատարվում է մեկ այլ ապրանքի միջոցով:

Բիզնես վարկերը տրամադրվում են անհատ ձեռնարկատերերին կամ իրավաբանական անձանց տնտեսական գործունեության իրականացման, այդ թվում նաև արտադրության կազմակերպման, առևտրի, ծառայությունների մատուցման, բիզնեսի ընդլայնման և զարգացման նպատակով:

Բնականոն գնաճը այն ցուցանիշն է, որը զերծ է գների շոկային (կարճաժամկետ և կտրուկ) տատանումներ ունեցող ապրանքների և ծառայությունների գնաճից:

ԱՊՊԱ ոլորտում կիրառվող ապահովագրավճարների զեղչերի և հավելավճարների համակարգ, որի համար հիմք է ընդունվում ապահովագրական և (կամ) վարորդական պատմությունը: Բոնուս-Մալուս համակարգը այն համակարգն է, որը գնահատում է վարորդի ռիսկայնությունը և շնորհում համապատասխան գործակից: Իսկ ապահովագրավճարը հաշվարկվում է (զեղչվում է կամ ավելացվում) ըստ այդ գործակիցների:

Ֆիզիկական կամ վիրտուալ տարածք, որտեղ բրոքերների, դիլերների և հավատարմագրային կառավարիչների միջոցով տեղի է ունենում արժեթղթերի և այլ ակտիվների (արժույթ, թանկարժեք մետաղներ, նավթ և այլն) առք և վաճառք:

ապրանքի կամ ծառայության այն գումարը, որը վաճառողը պահանջում է, իսկ գնորդը պատրաստ է վճարել:

Տնտեսության մեջ գների ընդհանուր մակարդակի բարձրացումն է կամ դրամաշրջանառության գերհագեցումը դրամով, որը բերում է դրամական միավորի արժեզրկմանը, գնողունակության փոքրացմանը, հետևաբար և գների աճին:

Գործառնական վարձակալությունը պայմանագիր է, որը սահմանում է ակտիվի` Վարձակալի կողմից ժամանակավոր օգտագործման իրավունքը:

Միջոց, որով ապահովվում է գրավատուի կողմից գրավառուի նկատմամբ պարտավորությունների կատարումը:

Այն անձն է, որի նկատմամբ գրավատուն ունի գրավով ապահովված պարտավորություն, այսինքն ում մոտ գրավատուն գրավ է դրել իր գույքը:

Այն անձն է, ում գույքը գրավ է դրված:

Ֆինանսական կազմակերպություն, որը գրավի դիմաց կարճաժամկետ վարկեր է տրամադրում ֆիզիկական անձնաց:

Գնաճի հակառակ երևույթն է, երբ ապրանքների և ծառայությունների գները նվազում են, արդյունքում աճում է սպառողների գնողունակությունը։ Արտահայտվում է բացասական թվով։ Տարբեր է դեզինֆլյացիայից, որը կենտրոնական բանկերի կողմից գնաճի տեմպը նվազեցնելու քաղաքականություն է։ Օրինակ՝ եթե անցյալ տարի գրանցվել է 4% գնաճ և այս տարի այն հասցրվում է 3%-ի։

Դեբետային քարտը վճարային քարտի տեսակ է, որը նախատեսված է գործարքներ կատարելու համար քարտապանի կողմից իր հաշվի վրա մուտքագրված դրամական միջոցների սահմաններում:

Այն մեծությունն է, որով ծախսերը գերազանցում են եկամուտներին:

Ռիսկերը զսպելու նպատակով ֆինանսական ծառայություններից օգտվելու տարբերակված մոտեցման կիրառում: Օրինակ՝ խնայողությունների ներդնում ավանդի տեսքով, պարտատոմս գնելու տեսքով, տանը և այլն:

Գների կայունության ապահովման նպատակով ՀՀ կենտրոնական բանկի կողմից մշակված, հաստատված և իրականացվող ծրագրեր:

Ֆիզիկական կամ իրավաբանական անձի գործունեության արդյունքում դրամական միջոցների ներհոսք (այն, ինչ վաստակում եք):

Ներդրման դիմաց ստացվող ընդհանուր եկամտի տոկոսային արտահայտությունը:

Երաշխավորողը այլ անձի փոխարեն պարտավորվում է պատասխանատվություն կրել այդ անձի կողմից իր պարտավորությունները չկատարելու կամ մասնակի կատարելու դեպքում:

Ֆինանսական կազմակերպությունների կողմից կամ պետության կողմից ստանձնած պարտավորություն` վճարել երրորդ կողմի փոխարեն, այն դեպքում, երբ վերջինս ի վիճակի չի լինի կամ կհրաժարվի վճարել:

Ապրանքների և ծառայությունների սկզբնական գնի նվազեցում որոշակի տոկոսով:

Էլեկտրոնային միջոցներով (ինտերնետ կայքերի, էլեկտրոնային փոստի եւ այլն) կատարվող առք ու վաճառք:

1 թերթից բաղկացած փաստաթուղթ, որը պարունակում է սպառողական վարկի տրամադրման հիմնական պայմանները՝ շուկայում առկա առաջարկները համեմատելու և արդյունավետ ընտրություն կատարելու նպատակով:

Բանկային հաշիվ, որը հաշվետիրոջը հնարավորություն է տալիս ցանկացած պահի օգտագործել այդ հաշվում առկա միջոցները:

Այս դեպքում ավանդային պայմանագիրը կնքվում է ավանդը որոշակի ժամկետի ավարտից հետո վերադարձնելու պայմանով: Ժամկետային ավանդի դեպքում ավանդատուն կարող է վերցնել ներդրված գումարը մինչ ավանդային պայմանագիրը լրանալը, և բանկը պարտավորվում է վերադարձնել ներդրված գումարը ամբողջությամբ: Սակայն տվյալ դեպքում հնարավոր է, որ բանկը ավանդատուին հատկացնի պայմանագրի կնքման պահին խոստացված տոկոսագումարների մի մասը կամ ընդհանրապես չվճարի տոկոսագումարներ:

Ցույց է տալիս, թե ինչքան արագ կարելի է ակտիվը վերածել կանխիկ փողի: Օրինակ` ինչքան արագ ոսկու ձուլակտորը կարելի է վաճառել:

Լիզինգը միջին կամ երկար ժամկետայնության ֆինանսական գործիք է, որն օգտագործվում է մեխանիզմների, սարքավորումների, ավտոմեքենաների և/կամ գույքի գնման նպատակով:

Ֆիզիկական կամ իրավաբանական անձ է, որը ձեռնարկատիրական գործունեության համար ստանում է արտադրական միջոցներ լիզինգատուի հետ համաձայնեցված պայմաններով: Լիզինգառուն (վարձակալ) լիզինգի պայմանագրով սահմանված ժամկետում կանոնավոր վճարումներ է կատարում Լիզինգատուին` նախօրոք համաձայնեցված տոկոսադրույքով:

Լիզինգատուն(վարձատու) այն ֆինանսական հաստատությունն է, որը գնում է Լիզինգառուի կողմից ընտրված սարքավորումը և սահմանված ժամկետով տրամադրում այն վերջինիս:

Բանկային տոկոսադրույք, որ կցվում է այլ բազիսային տոկոսադրույքի և փոփոխվում է` ելնելով բազիսային տոկոսադրույքի փոփոխություններից: Օրինակ` բանկերը կարող են սահմանել «Կենտրոնական բանկի վերաֆինանսավորման տոկոսադրույք +1%», ինչը նշանակում է, որ այն կփոփոխվի, եթե փոփոխվի ԿԲ վերաֆինանսավորման տոկոսադրույքը:

Ֆիզիկական կամ իրավաբանական անձի գործունեության արդյունքում դրամական միջոցների արտահոսք:

Ապահովադրի կամավոր ցանկությամբ ապահովագրական ընկերության հետ ապահովագրության պայմանագիր կնքելու միջոցով իրականացվող ապահովագրությունն է:

Այն, առանց որի Դուք չեք կարող ապրել: Լավ օրինակ է սնունդը: Դրա բացակայության դեպքում անձը կտուժի կա՛մ ֆիզիկապես, կա՛մ հոգեպես, կա՛մ 2-ը միաժամանակ: Օրինակ՝ առողջ ապրելակերպ ապահովելու համար բավարար սնունդը կլինի կարիք, իսկ շատ ավելին, ինչը պարտադիր չէ բոլորի համար, կդիտվի արդեն որպես ցանկություն: Ցանկություն՝ այն, ինչը կցանկանայիք ունենալ: Կյանքը կարող է շարունակվել նաև առանց դրա, բայց լավ կլիներ, եթե լիներ: Օրինակ կարող է լինել պաղպաղակը, կինո գնալը, ռեստորանում ճաշելը և այլն:

Հայաստանի Հանրապետության կենտրոնական բանկը (այսուհետ՝ Կենտրոնական բանկ) պետական գործառույթներով օժտված իրավաբանական անձ է, որի միակ հիմնադիրը Հայաստանի Հանրապետությունն է: Հայաuտանի Հանրապետության կենտրոնական բանկի հիմնական խնդիրը Հայաuտանի Հանրապետությունում գների կայունությունն ապահովելն է: Իր հիմնական խնդիրն իրագործելու նպատակով Կենտրոնական բանկի գործառույթն է հանդիսանում գների կայունության ապահովմանն ուղղված միջոցների ձեռնարկումը:

Ապահովագրության տեսակ, որի դեպքում ապահովագրված անձի մահվանից հետո գումար է վճարվում նրա ժառանգներին:

Բաժնետոմս է, որը դրա տիրոջը իրավունք է տալիս ստանալ շահաբաժիններ, միայն արտոնյալ բաժնետիրոջը շահաբաժիններ վճարելուց հետո, սակայն հասարակ բաժնետերը իրավունք ունի մասնակցել բաժնետերերի ժողովին` վճռական ձայնի իրավունքով:

Տվյալ ժամանակահատվածում բիզնեսի կողմից վաճառված ապրանքների և/կամ ծառայությունների ընդհանուր արժեքը:

Ծախսեր, որոնք չեն փոփոխվում արտադրության ծավալների փոփոխությունից: Օրինակ` անկախ նրանից, թե քանի հաճախորդ եք սպասարկել օրվա ընթացքում, բանկի տարածքի վարձակալության վճարը կմնա նույն գումարը:

Անձ կամ կազմակերպություն, որ իր հայեցողությամբ կատարում է հաճախորդի ֆինանսական միջոցները արժեթղթերում և այլ ակտիվներում տեղաբաշխելու գործառույթ:

Հավատարմագրային կառավարիչի կողմից իր հայեցողությամբ հաճախորդի ֆինանսական միջոցները արժեթղթերում և այլ ակտիվներում տեղաբաշխելու գործառույթ):

Կառավարության կողմից ձեռնարկված միջոցառումներն են՝ կապված հարկային քաղաքականության և պետական ծախսերի փոփոխության հետ՝ տնտեսությունում լրիվ զբաղվածություն և բարձր տնտեսական աճ ապահովելու նպատակով:

Վճարումներ են, որոնք պարտադիր կարգով վճարում են իրավական և ֆիզիկական անձինք, անհատները, ձեռնարկությունները, կազմակերպությունները և այլն՝ պետական ծախսերը ֆինանսավորելու նպատակով:

Տրամադրվում են տուն ձեռք բերելու, վերանորոգելու կամ կառուցապատելու համար` գրավադրելով այդ տունը կամ հողամասի կառուցապատման դեպքում` հողամասի կառուցապատման իրավունքը:

Որոշակի ժամանակահատվածում տվյալ երկրում արտադրված պատրաստի ապրանքների և ծառայությունների շուկայական արժեքն է

ՀՀ կենտրոնական բանկի կողմից իրականացվող գործողությունները և քաղաքականությունները, որոնք վերաբերում են ֆինանսական ամբողջ համակարգին և կրում են կանխազգուշացնող բնույթ, այսինքն՝ գործ ունենք ֆինանսական ռիսկերի հետ, որոնք պետք է զսպվեն այս քաղաքականության միջոցով:

Մուրհակը սահմանված ձև ունեցող գրավոր պարտավորություն է, որը նրա տիրոջը իրավունք է տալիս սահմանված ժամկետի լրանալուց հետո պահանջել մուրհակում նշված գումարի վճարումը:

Վարկով վերցրած գումարը՝ առանց տոկոսագումարների և այլ վճարների:

Խնայողությունների օգտագործումը՝ ֆինանասական գործիքների միջոցով լրացուցիչ եկամուտ ստանալու նպատակով:

Ֆիզիկական անձ կամ կազմակերպություն, որ օգնում է հաճախորդներին գնել և վաճառել բաժնետոմսեր, պարտատոմսեր և այլ արժեթղթեր` որպես վարձատրություն ստանալով կատարված գործարքից տոկոս, երբեմն նաև ֆիքսված գումար:

Շահույթի բաշխումը բաժնետերերի միջև՝ իրենց պատկանող բաժնետոմսերի քանակին համապատասխան:

Տվյալ ժամանակահատվածում բիզնեսի ստացված հասույթի և կատարված ծախսերի տարբերությունը:

Չհատուցվող գումարը կամ ֆրանշիզան ապահովագրական պայմանագրով սահմանված այն գումարն է, որի չափով ապահովադիրը մասնակցում է վնասի փոխհատուցմանը: Ոչ պայմանական չհատուցվող գումարի դեպքում անկախ վնասի չափից ապահովագրողը որոշակի մասով ազատվում է վնասի փոխհատուցումից:

Վճարային փաստաթուղթ, որը պարունակում է չեկ դուրսգրողի հրամանը իր բանկին վճարել չեկի վրա նշված գումարը այն անձին, ով կներկայացնի չեկը:

Չհատուցվող գումարը կամ ֆրանշիզան ապահովագրական պայմանագրով սահմանված այն գումարն է, որի չափով ապահովադիրը մասնակցում է վնասի փոխհատուցմանը: Պայմանական չհատուցվող գումարի դեպքում դեպքում ապահովագրողը ազատվում է վնասների հատուցման պարտականությունից, եթե այդ վնասը չի գերազանցում ապահովագրական պայմանագրով սահմանված չհատուցվող գումարի չափը, և պարտավոր է վճարել հատուցումն ամբողջությամբ, եթե դրա մեծությունը գերազանցում է չհատուցվող գումարի չափը:

Տոկոսային ցուցանիշ, որ յուրաքանչյուր անգամ հաշվարկվում է սկզբնական գումարի նկատմամբ: Օրինակ` եթե 1000 դրամ ավանդ ներդնեք 10%-ով, ապա յուրաքանչյուր տարի կստանաք հաստատուն 100 դրամ:

Ապահովադրի կամքից անկախ` oրենքով սահմանված պահանջ է ապահովագրողի հետ ապահովագրության պայմանագիր կնքելու վերաբերյալ:

Արժեթուղթ, որը հավաստում է դրա տիրապետողի իրավունքը՝ դրանում նախատեսված ժամկետում պարտատոմս թողարկած անձից ստանալ պարտատոմսի անվանական արժեքը կամ գույքային այլ համարժեք:

Տարեկան ֆինանսական փաստաթուղթ է, որն արտացոլում է կառավարության եկամուտներն ու ծախսերը ֆինանսական տարվա համար:

Բանկի կողմից վճարային քարտի տրամադրման ժամանակ քարտատիրոջը տրամադրվող գաղտնի կոդ, որն անհրաժեշտ է մուտքագրել բանկոմատից կամ էլեկտրոնային տերմինալից գործառնություններ իրականացնելու ժամանակ: ՊԻՆ կոդը տրամադրվում է փակ ծրարի մեջ: Այն գաղտնի կոդ է, ենթակա չէ որևէ մեկին տրամադրման: Սովորաբար այն ունենում է 4 կամ 6 նիշ:

Պաշտոնական հայտարարություն` համաձայն որի ֆիզիկական կամ իրավաբանական անձը ֆինանսապես ի վիճակի չէ վճարել իր ունեցած պարտքերը:

ՀՀ-ում սպառողական ապրանքների գնաճը հաշվարկվում է սպառողական գների ինդեքսով (ՍԳԻ), որի հիմքում ընկած է 452 (2017 թվականի տվյալներով) ապրանքից և ծառայությունից բաղկացած սպառողական զամբյուղը։ Այս զամբյուղը կառուցվում է այնպես, որպեսզի հնարավորինս ճիշտ արտացոլի ՀՀ տնային տնտեսությունների (ընտանիքների) կողմից միջինում սպառվող ապրանքների և ծառայությունների ամբողջությունը։

Սպառողական զամբյուղը ներառում է 452 (2017 թվականի տվյալներով) անուն ապրանք և ծառայություն, որը կառուցված է այնպես, որ հնարավորինս ճիշտ արտացոլի ՀՀ տնային տնտեսությունների (ընտանիքների) կողմից միջինում սպառվող ապրանքների և ծառայությունների ամբողջությունը։

Այն վարկերն են, որոնք տրամադրվում են ֆիզիկական անձ սպառողին՝ ապրանքներ ձեռք բերելու կամ այլ ծախսեր հոգալու համար: Սպառողական վարկերը տրամադրվում են միայն ՀՀ դրամով:

Ֆիզիկական կամ իրավաբանական անձ է, որը, համաձայն լիզինգատուի հետ կնքած առքուվաճառքի պայմանագրի, պայմանավորված ժամկետում նրան է վաճառում լիզինգի առարկա հանդիսացող գույքը:

Վերադարձնելու և տոկոսներ վճարելու պայմանով տրամադրվող դրամական միջոցներ` ապրանքների, ծառայությունների կամ աշխատանքների ձեռբքերումը ֆինանսավորելու համար: Վարկի դեպքում վարկատուն պարտավորվում է տրամադրել վարկառուին դրամական միջոցներ, իսկ վերջինս պարտավորվում է վերադարձնել ստացված գումարը և դրա դիմաց վճարել տոկոսագումար (տոկոսներ):

Վարկային բյուրոն (ԱՔՌԱ) մասնավոր կառույց է, որը օրենքով թույլատրված շրջանակում հավաքագրում, մշակում, պահպանում և տրամադրում է տեղեկատվություն անձանց ֆինանսական պարտավորությունների կատարման վերաբերյալ: Վարկային բյուրոյի ծառայությունները թույլ են տալիս վարկատուներին (բանկեր, վարկային կազմակերպություններ) գնահատել Ձեր ռիսկայնությունը որպես վարկառու:

Ընթացիկ ծախսերի իրականացման համար բանկի կողմից տրամադրվող կարճաժամկետ վարկն է, որը հնարավորություն է տալիս հաճախորդին ծախսել ավելի շատ գումար, քան առկա է իր բանկային հաշվի վրա:

Իրավաբանական անձ է, որը տրված լիցենզիայի հիման վրա ներգրավում է փոխառություններ և տրամադրում վարկեր:

Անձի կողմից վերցրած վարկերի և դրանց մարումների վերաբերյալ ամբողջական տեղեկատվություն, որ մշակվում և պահվում է բանկերի և վարկային կազմակերպությունների կողմից: Այս տեղեկությունը հետագայում նոր վարկեր տրամադրելիս օգտագործվում է հաճախորդի մասին կարծիք կազմելու համար:

Սպառողների պարտավորությունների վերաբերյալ տեղեկությունների շտեմարան, որը հիմնականում օգտագործվում է հետազոտական նպատակներով։

Այն անձն է, ով ստանում է վարկ:

Այն անձը, որը տրամադրում է վարկ: Վարկատու են բանկերը, վարկային կազմակերպությունները և գրավատները։

Վարկերը ըստ նպատակայնության լինում են սպառողական, հիփոթեքային, գյուղատնտեսական, բիզնես։ Սպառողական վարկերը իրենց հերթին կարող են լինել ավտովարկ, ոսկու գրավով, ապառիկ, քարտային և այլ։

Այն ժամանակացույցը, որին պետք է հետևել, վարկը ժամանակին պատասխանատու ձևով վերադարձնելու համար։

Պոտենցիալ վարկառուի ունակությունն է վարկը պատշաճ կերպով և ժամանակին մարելու:

Վճարային քարտի տեսակ է, որը նախատեսված է վճարային քարտեր թողարկող ֆինանսական կազմակերպության կողմից քարտապանի հաշվին վարկի ձևով տրամադրված գումարի սահմաններում քարտապանի կողմից գործառնություններ իրականացնելու համար` վարկային պայմանագրի պայմանների համաձայն:

Կենտրոնական բանկի կողմից հաշվարկվող տոկոսադրույք է, որով Կենտրոնական բանկը վարկ է տալիս առևտրային բանկերին:

Անկանխիկ վճարումներ իրականացնելու նպատակով բանկի կողմից հաճախորդին տրամադրվող քարտ: Վճարային քարտը հնարավորություն է տալիս այն տիրապետողին իրականացնել մի շարք գործողություններ` 1.             կատարել վճարումներ առևտրի և սպասարկման կետերում ապրանքների կամ ծառայությունների դիմաց, 2.            ստանալ կանխիկ միջոցներ բանկի բաժանմունքներից և բանկոմատներից, 3.            բանկոմատների միջոցով կատարել կոմունալ վճարումներ, 4.            իրականացնել ինտերնետային առևտուր, 5.            կանխել դրամական միջոցների հավանական կորուստը և վտանգները (հրդեհից, ջրից, պատռվելուց, գողությունից…) և այլ։

Եկամուտների և ծախսերի տարբերությունը, երբ ծախսերը գերազանցում են եկամուտները:

Առանց ֆիզիկական առկայության քարտ է, որը հնարավորություն է տալիս կատարել դրամական փոխանցումներ, վճարումներ և ինտերնետային գնումներ

Բանկի (վարկային կազմակերպության) կողմից հայտարարվող այն տոկոսադրույքն է, որի հիման վրա հաշվարկվում են վարկի դիմաց վճարվող տոկոսագումարները:

Տարեկան տոկոսային եկամտաբերությունը ցույց է տալիս, թե որքան կկազմի ավանդի տարեկան եկամտաբերությունը` ավանդատուի կողմից ավանդի հետ կապված պարտադիր վճարները կատարելու և ավանդից ստացված տոկոսագումարները ավանդատուի ներդրած ավանդի մայր գումարին ավելացնելու արդյունքում։

Տարեկան փաստացի տոկոսադրույքը այն տոկոսադրույք է, որը ցույց է տալիս վարկի իրական արժեքը՝ հաշվի առնելով տոկոսավճարների կատարման հաճախականությունը և վարկի հետ կապված բոլոր ծախսերը՝ տոկոսավճարները, ինչպես նաև վարկի տրամադրման և սպասարկման գծով բոլոր այլ ծախսերը:

Սպառողի ինչ-որ ապրանք կամ ծառայություն ձեռք բերելու մտադրություն, որը կարող է անհրաժեշտություն չլինել։

Այս դեպքում ավանդային պայմանագիրը կնքվում է ավանդն առաջին իսկ պահանջով վերադարձնելու պայմանով: Սա նշանակում է, որ եթե ավանդատուն ցանկանում է մինչ ավանդային պայմանգրի լրանալը ետ վերցնել ավանդի գումարը, բանկը պարտավորվում է ավանդի գումարը և ավանդի դիմաց ստացված տոկոսագումարները ամբողջությամբ վերադարձնել ավանդատուին:

Գործարք, համաձայն որի մի կողմը (փոխատուն), որպես սեփականություն տրամադրում է փող կամ գույք մյուս կողմին (փոխառուին), իսկ վերջինս պարտավորվում է վերադարձնել միևնույն չափի փող կամ ստացված գույքին հավասար քանակի և որակի գույք, ինչպես նաև վճարել տոկոսներ, եթե այլ բան նախատեսված չէ փոխառության պայմանագրով:

Ակտիվի տեսակ, սովորաբար արժույթ, որ կարող է փոխանակվել ապրանքների և ծառայությունների դիմաց` հանդես գալով որպես վճարման միջոց:

Ծախսեր, որոնք փոփոխվում են կախված արտադրության ծավալից: Օրինակ` եթե դուք օրվա ընթացքում քիչ հաճախորդներ սպասարկեք, քիչ աշխատողներ կվարձեք և աշխատավարձի ծախսերը քիչ կլինեն: Իսկ եթե հաճախորդների թիվը մեծանա, ապա պետք է սպասարկման բաժնում լրացուցիչ աշխատողներ վարձել և ավելացնել աշխատավարձի համար նախատեսված գումարները (այսինքն` ծախսերը կմեծանան):

Ֆինանսավորում դրամական պահանջի զիջման դիմաց: Ֆակտորինգի պայմանագրով ապրանքների և ծառայությունների վաճառողը զիջում է գնորդի նկատմամբ ունեցած դրամական պահանջը ֆինանսական կազմակերպությանը, իսկ ֆինանսական կազմակերպությունը պարտավորվում է վճարել դրամական միջոցներ վաճառողին, գնորդն էլ իր հերթին պարտավորվում է վճարումներ կատարել ֆինանսական կազմակերպությանը:

Ֆինանսական վարձակալությունը պայմանագիր է, որը թույլ է տալիս վարձատուին պահպանել ակտիվի նկատմամբ սեփականության իրավունքը որպես սեփականատեր` սեփականության բոլոր ռիսկերը և հասույթները փոխանցելով վարձակալին:

Ֆինանսական համակարգի հաշտարարի գրասենյակը բանիմաց և պրոֆեսիոնալ մասնագետներից բաղկացած կառույց է, որը կոչված է լուծելու ֆիզիկական անձանց և ֆինանսական կազմակերպությունների միջև ծագած վեճերը` անվճար հիմունքներով և սեղմ ժամկետներում:

Տոկոսադրույքի տեսակ, որը չի կցվում որևէ այլ բազիսային տոկոսադրույքի և սովորաբար չի փոփոխվում պայմանագրի գործողության ողջ ժամկետի ընթացքում:

Վճարային քարտի դարձերեսին նշվող եռանիշ կոդ, որը թույլ է տալիս նույնականացնել քարտի տվյալները՝ օնլայն վճարումներ կատարելու ժամանակ: