Համաձայն «Ավտոտրանսպորտային միջոցների օգտագործումից բխող պատասխանատվության պարտադիր ապահովագրության մասին» ՀՀ օրենքի (այսուհետ` Օրենք)` 34-րդ հոդվածի 2-րդ մասի «Հայաստանի ավտոապահովագրողների բյուրո» ԻԱՄ (այսուհետ` Բյուրո) խորհրդի մեկ անդամ ընտրում են սպառողների իրավունքները պաշտպանող, առնվազն երեք տարվա պետական գրանցում ունեցող կազմակերպությունները`իրենց միջև ձեռք բերված պայմանավորվածությամբ`երկու տարի ժամկետով:
Ի կատարումն Օրենքի 34-րդ հոդվածի 3-րդ մասի պահանջների և հաշվի առնելով այն հանգամանքը, որ խորհրդի վերոհիշյալ անդամի պարտականությունները վաղաժամկետ դադարեցվել են` ՀՀ կենտրոնական բանկը հայտարարում է, որ 2010 թվականի փետրվարի 25-ին` ժամը 10:00-ին ՀՀ կենտրոնական բանկի շենքում` ք. Երևան, Վ. Սարգսյան 6 հասցեում, տեղի է ունենալու ժողով սպառողների իրավունքները պաշտպանող կազմակերպությունների կողմից Բյուրոյի խորհրդի անդամի ընտրության համար:
Բոլոր այն կազմակերպությունները, որոնք բավարարում են Օրենքով սահմանված պահանջներին և ցանկանում են մասնակցել վերը նշված համապատասխան ժողովին պետք է մինչև 2010 թվականի փետրվարի 10-ը այդ մասին գրավոր հայտ ներկայացնեն ՀՀ կենտրոնական բանկ` հայտին կցելով իրենց պետական գրանցման վկայականի և կանոնադրության պատճենները:
Այն կազմակերպությունները, որոնք մտադիր են հիշյալ ժողովին ներկայացնել Բյուրոյի խորհրդի անդամի թեկնածու, հայտին պետք է կցեն նաև այդ թեկնածուի անունը և ազգանունը, տեղեկություններ նրա կրթության և աշխատանքային փորձի վերաբերյալ, փոխկապակցվածությունը Բյուրոյի անդամների հետ (բացակայության դեպքում` նշում փոխկապակցվածության բացակայության մասին), նրան առաջադրող կազմակերպության (կազմակերպությունների)անվանումը (անվանումները) և վերջինի (վերջինների) հավաստումն առ այն, որ ներկայացված թեկնածուներն իրենց մասնագիտական կարողություններով ի վիճակի են ապահովել օրենքով և դրա հիման վրա ընդունված իրավական այլ ակտերով սահմանված խորհրդի լիազորությունների պատշաճ իրականացումը, և առկա չեն Բյուրոյի կանոնադրության 123-րդ կետով սահմանված սահմանափակումները:
Ժողովին մասնակցելու համար համապատասխան կազմակերպությունների ներկայացուցիչները ժողովի անցկացման վայր պետք էներկայանան իրենց անձը և տվյալ կազմակերպությունը ներկայացնելու լիազորությունները հավաստող փաստաթղթերով:
ՀՀ կենտրոնական բանկի ֆինանսական կրթման թիմը ողջունում է կրթական ծրագրերին աջակից դառնալու ձեր ցանկությունը: Մենք արժևորում ենք ձեր տաղանդն ու ժամանակը և ուրախ կլինենք տեսնել ձեզ մեր կամավորների շարքում։