Հուլիսի 16-ին, ՀՀ կենտրոնական բանկում տեղի ունեցավ ՀՀ-ում ֆինանսական կրթման ազգային ռազմավարության մշակման և իրագործման հանձնաժողովի հերթական 8-րդ նիստը:

ՀՀ ԿԲ խորհրդի անդամ Արմենակ Դարբինյանի գլխավորությամբ հանձնաժողովի անդամները ամփոփեցին վերջին եռամսակի ընթացքում ազգային ռազմավարության ներքո իրականացրած գործունեությունը և առաջիկայում կատարվելիք աշխատանքները: Նիստի ժամանակ հաստատվեց, որ այս տարի ևս հոկտեմբեր ամսին իրականացվելու է «Իմ ֆինանսների ամիս» ծրագիրը և ազդարարվեց  նախապատրաստական աշխատանքների սկիզբը:

Այսօրվա հանդիպման ժամանակ  Ֆինանսական կրթման ազգային ռազմավարության  մշակման և իրագործման հանձնաժողովի անդամները քննարկեցին և ներկայացրին նոր ծրագրերը, որոնց աշխատանքներն արդեն մեկնարկել են: Այդ ծրագրերն են՝                                                  

• Ֆինանսները դպրոցում ծրագիրը. 
  Ծրագրի նպատակն է զարգացնել հանրակրթական հաստատություններում սովորողների ֆինանսական ունակությունները՝ներդնելով անձնական ֆինանսների կառավարման բաղադրիչը կրթական ծրագրերում,    
• Ֆինանսները գյուղերում. Ֆինանսական ունակությունների վերաբերյալ տարաբնույթ սեմինարների միջոցով բարձրացնել գյուղական համայնքներում բնակվող մարդկանց գիտելիքները և հմտությունները, որը հետագայում կնպաստի նրանց կողմից համապատասխան վարքագծի դրսևորմանը, 
• Խնայողությունների խաղը,  
• Բյուջեի գրքույկ:

Նիստի ժամանակ նաև առաջարկվեց և քննարկվեց ֆինանսական կրթման  հետագա նախագծերի իրականացման համար աշխատանքային խմբերի ձևավորման և գործունեության նոր ձևաչափը: