Մայիսի 12-ին Տեղի ունեցավ «Իմ Ֆինանսների Ամիս 2016» ծրագրի փակման արարողությունը: Արդեն 3-րդ տարին է ինչ Հայաստանում անցկացվում է ավանդույթ դարձած «Իմ Ֆինանսների Ամիս» լայնածավալ միջոցառումների ծրագիրը, որը կազմում է ՀՀ Ֆինանսական կրթման ազգային ռազմավարության մաս: Ծրագրի նպատակը հանրության շրջանում անձնական ֆինանսների կառավարման հարցի կարևորումն է: Ծրագիրը անցկացվել է ապրիլի 1-30:
Ծրագրի միջոցառումները ուղղված են եղել մի շարք գիտելիքների և հմտությունների ուժեղացմանը, օրինակ, ինչպես արդյունավետ պլանավորել եկամուտներն ու ծախսերը, կատարել արդյունավետ խնայողություններ, խուսափել գերպարտքից, պաշտպանել իրավունքները ֆինանսական աշխարհում, զերծ մնալ ֆինանսական զեղծարարություններից և այլն:
Ծրագրի ընթացքում հանրության համար ֆինանսական շուկայի ներկայացուցիչների մասնակցությամբ իրականացվել են ուսուցողական և տեղեկատվական միջոցառումներ:
ՀՀ ԿԲ խորհրդի անդամ Արմենակ Դարբինյանը մանրամասն ներկայացրել է ծրագրի շրջանակում կազմակերպվող միջոցառումները և նրանց արդյունքները: Ընդհանուր ծրագրին մասնակցել է շուրջ 5000 մասնակից: Հատկապես հատկանշական է, որ ծրագրի նկատմամբ հետաքրքրությունը նախորդ տարիների համեմատ կրկնակի անգամ աճել է. Օրինակ՝ «ֆինանսական շրջագայության» միջոցառմանը մասնակցել են ավելի քան 500 երիտասարդներ, շուրջ 500 քաղաքացիներ մասնակցել են ֆինանսական ոլորտի փորձագետների կողմից գլխավոր դրամատանը անցկացվող տարբեր ֆինանսական թեմաներով բաց սեմինարներին: Իրականացվել է «Ի՞նչ, որտե՞ղ, ե՞րբ» միջհամալսարանական ինտելեկտուալ առաջնություն, որին մասնակցել են շուրջ 150 մասնակից տարբեր համալսարաններից, ինչպես նաև բանավեճերի միջհամալսարանական մրցաշար, որին մասնակցել են 100 ուսանող տարբեր համալսարաններից: Անցկացվել է Ֆինանսատնտեսագիտական խաղ-մրցույթ, որին մասնակցել են 150 աշակերտներ ՀՀ մարցերից և Երևանի դպրոցներից: Մարզերում և Երևան քաղաքում անցկացվել խնայողությունների խաղ Գերմանական խնայբանկերի միության կողմից: Խնայողության խաղին մասնակցել են շուրջ 200 մասնակից: Հայտարարված մրցույթներին ներկայացրել են մոտ 270 աշխատանքներ: Ավելացել է Ֆինանսներ բոլորի համար (www.abcfinance.am) կայքի հետևորդների թիվը մոտ 3800-ով:
Ծրագրի գործընկերներն են Ֆինանսական համակարգի հաշտարարի գրասենյակը, Ավանդների հատուցումը երաշխավորող հիմնադրամը, Հայաստանի բանկերի միությունը, ՀՀ Վարկային կազմակերպությունների միությունը, Երևանի Քաղաքապետարանը, Հայաստանի ավտոապահովագրողների բյուրոն, ՆԱՍԴԱՔ ՕԷՄԷՔՍ Արմենիան, Հայաստանի պատանեկան նվաճումները, Կենսաթոշակային համակարգի իրազեկման կենտրոնը, Գերմանական խնայբանկերի հիմնադրամի հայաստանյան ներկայացուցչությունը, Եվրոպական երիտասարդական պառլամենտը, մի շարք առևտրային բանկեր, վարկային կազմակերպություններ և ապահովագրական ընկերություններ:
Ծրագրի վերաբերյալ մանրամասն տեղեկատվություն առկա է www.abcfinance.am կայքում, ինչպես նաև համանուն facebook-յան և twitter-յան էջերում:
Հաղորդագրությունից օգտվելու դեպքում հղումը սկզբնաղբյուրին պարտադիր է:
հեռ/ֆաքս. 010 56 37 61 կամ 010 592 697
էլ-փոստ