Օգոստոսի 17-ին ՀՀ ողջ տարածքում սկսվեցին «Ֆինանսական կրթությունը դպրոցում» ծրագրի շրջանակում իրականացվող առցանց վերապատրաստումները։
Ֆինանսական կրթության վերապատրաստումները հնարավորություն կտան նպաստելու ուսուցիչների ֆինանսական հմտությունների զարգացմանը, արդյունավետ որոշումների կայացմանը, ինչպես նաեւ կզինեն նրանց ֆինանսական ուսումնական բաղադրիչն իրենց առարկաներում ինտեգրելու ու դասավանդելու մեթոդներով։
ՀՀ կենտրոնական բանկը, ՀՀ Կրթության, գիտության, մշակույթի եւ սպորտի նախարարությունը եւ Խաչատուր Աբովյանի անվան հայկական պետական մանկավարժական համալսարանը համատեղ իրականացնում են վերապատրաստողների եւ ուսուցիչների վերապատրաստման դասընթացներ: Մեթոդական եւ ֆինանսական վերապատրաստողների վերապատրաստման դասընթացը հաջողությամբ ավարտած 49 առարկայական եւ 19 ֆինանսական թրեյներներն այժմ իրականացնում են ֆինանսական կրթում իրականացնող դպրոցների ուսուցիչների առցանց վերապատրաստումներ Հայաստանի բոլոր մարզերում:
Ծրագրում ընդգրկվում են «Ես և շրջակա աշխարհը», «Հասարակագիտություն», «Մաթեմատիկա» և «Հանրահաշիվ» առարկաների ուսուցիչները, ովքեր ֆինանսական կրթման ինտեգրմամբ դասեր են անցկացնելու 2-րդ 11-րդ դասարանցիների համար։ 2020թ. ուսուցիչների վերապատրաստման դասընթացը յուրաքանչյուր խմբի համար տեղի է ունենալու երկու փուլով. 1-ին փուլը կանցկացվի օգոստոսի 17-ից 29-ը, 2-րդը՝ հոկտեմբերին:
Հիշեցնենք, որ 2018 թվականից սկսած Հայաստանում ուսուցիչները վերապատրաստվում են՝ ֆինանսական կրթության ինտեգրմամբ դասընթացներ իրականացնելու նպատակով։ Ծրագիրը բարեհաջող ավարտել են արդեն 685 դպրոցների 4951 ուսուցիչներ։
ՀՀ կենտրոնական բանկի ֆինանսական կրթման թիմը ողջունում է կրթական ծրագրերին աջակից դառնալու ձեր ցանկությունը: Մենք արժևորում ենք ձեր տաղանդն ու ժամանակը և ուրախ կլինենք տեսնել ձեզ մեր կամավորների շարքում։