ՀՀ կենտրոնական բանկի աջակցությամբ և «Մխիթար Սեբաստացի» կրթահամալիրի կազմակերպմամբ 2015 թվականի մարտ և ապրիլ ամիսներին «Մխիթար Սեբաստացի» կրթահամալիրում կայացավ «Երեխաների և երիտասարդների ֆինանսների միջազգային կազմակերպության» (Child & Youth Finance International) «Փողի միջազգային շաբաթ» (Global Money Week) ծրագիրը, որը շարունակվեց «Տնտեսական միամսյակ» ծրագրի միջոցառումներով:
Առաջին փուլը սեմինարների փուլն էր, որի ընթացքում աշակերտներին փոխանցվեցին գիտելիքներ տնտեսագիտական տարբեր ոլորտների վերաբերյալ, ինչպիսիք են տնտեսագիտության հիմունքները, գնաճի էությունը, դրամավարկային քաղաքականությունը, գովազդը, անձնական ֆինանսները, ազգային հաշիվների համակարգը և այլն: Նրանց դասավանդողների շարքում էին մասնագետներ ՀՀ կենտրոնական բանկից, Հայաստանի ամերիկյան համալսարանից, Հայաստանում ֆրանսիական համալսարանից:
Սեմինարներին մասնակցեցին ընդհանուր թվով 120 դպրոցականներ «ԱՅԲ» ավագ դպրոցից, «Երևանի պետական տեխնոլոգիական քոլեջ»-ից, Եղվարդի թիվ 1 ավագ դպրոցից և «Մխիթար Սեբաստացի» կրթահամալիրից:
Սեմինարների ավարտին դպրոցականներին հանձնվեցին գնահատման թերթիկներ, որոնց ամփոփման արդյունքում ամենաշատ ճիշտ պատասխաններ տված մասնակիցը Մարիամ Մանսուրյանն արժանացավ ՀՀ կենտրոնական բանկի պատվոգրին:
Սեմինարների ամենաակտիվ մասնակիցը՝ Կարինե Հովհաննիսյանը և ամենահարցասերը՝ Հարություն Չոբանյանը, նույնպես արժանացան Կենտրոնական բանկի պատվոգրերին:
Սեմինարներին հաջորդեցին բանավեճերը հետյալ թեմաներով՝
Բանավեճերին մասնակցում էին «Մխիթար Սեբաստացի» կրթահամալիրի, «ԱՅԲ» ավագ դպրոցի, «Երևանի պետական տեխնոլոգիական քոլեջ»-ի սաները: Ժյուրիի անդամները ՀՀ կենտրոնական բանկի դրամավարկային քաղաքականության վարչության ու սպառողների շահերի պաշտպանության և ֆինանսական կրթման կենտրոնի աշխատակիցներն էին: Թեժ պայքարի արդյունքում 2-րդ տեղում էր «ԱՅԲ» ավագ դպրոցի «ԱՅԲ Էկոն» թիմը, իսկ հաղթանակը տարավ «Մխիթար Սեբաստացի» կրթահամալիրի «Վարժարանցիներ» թիմը:
Հաղթողները պարգևատրվեցին ՀՀ կենտրոնական բանկի պատվոգրերով և գրախանութի նվեր-քարտերով:
Կայացած սեմինարների և բանավեճերի վերաբերյալ մանրամասները ներկայացված են նախորդ նորություններում:
Միամսյակի փակման արարողության ժամանակ ամփոփվեցին նաև մրցույթները:
Առաջին՝ «Ինչպես կտնօրինեի իմ առաջին միլիոնը» խորագրով շարադրության մրցույթի հաղթող ճանաչվեց 14-ամյա Էլինա Հակոբյանը՝ «Մխիթար Սեբաստացի» կրթահամալիրից: Լավագույն շարադրությունները կարող եք կարդալ այս հղումներով՝
Երկրորդը Կոմերցիոն/սոցիալական գովազդի մրցույթն էր, որում հաղթանակ տարավ «Մխիթար Սեբաստացի» կրթահամալիրի 15-ամյա սան Նարեկ Սահակյանը, ով կոչ է անում պահպանել մեր անտառները, բնությունը:
Հաղթողները պարգևատրվեցին պատվոգրերով և գրախանութի նվեր-քարտերով:
Կենտրոնական բանկի շնորհակալագրեր հանձնվեցին ծրագրի կազմակերպիչներ Արման Երանոսյանին («Մխիթար Սեբաստացի» կրթահամալիրի «Տնտեսագետի ակումբի» ղեկավար) և Մերի Թելունցին ((«Մխիթար Սեբաստացի» կրթահամալիրի սան): Նրանց ջանքերը բերեցին ցանկալի արդյունքի:
Շնորհավորում ենք ձեռք բերված գիտելիքների համար, ակնկալում դրանց շարունակական հարստացում:
Հաղորդագրությունից օգտվելու դեպքում հղումը սկզբնաղբյուրին պարտադիր է:
ՀՀ կենտրոնական բանկի ֆինանսական կրթման թիմը ողջունում է կրթական ծրագրերին աջակից դառնալու ձեր ցանկությունը: Մենք արժևորում ենք ձեր տաղանդն ու ժամանակը և ուրախ կլինենք տեսնել ձեզ մեր կամավորների շարքում։