«Ինչպե՞ս կարելի է գումար խնայել, խնայած գումարը որտեղ պահել և որտեղ ապահով ներդնել» ահա այս և այլ հարցերի պատասխանները պարզաբանեցին ՀՀ կենտրոնական բանկի և Ավանդների հատուցումը երաշխավորող հիմնադրամի աշխատակիցները մայիսի 13-ին եւ 14-ին Գորիս եւ Սիսիան քաղաքների աշակերտների ու ուսուցիչների հետ:
Սեմինարի ընթացքում մասնակիցները ստացան գործնական գիտելիքներ անձնական ֆինանսների ճիշտ կառավարման և խնայողությունների կատարման վերաբերյալ: Մասնակիցների շրջանում բուռն քննարկում ծավալվեց «Ինչպես կարող են տնօրինել իրենց խնայողությունները» թեմայի շուրջ: Սեմինարավարները, իրենց հերթին, օգտակար խորհուրդներ տվեցին, թե ինչպես կարող են ապահով պահել իրենց խնայողությունները և դրանց դիմաց ստանալ եկամուտներ: Քննարկման հիմնական թեմաներից էր բանկերում ավանդ ներդնելու առավելությունները, ՀՀ-ում գործող Ավանդների հատուցումը երաշխավորող հիմանդրամի գործունեությունը և բանկերում երաշխավորված ավանդների սահմանաչափերը:
Սեմինարները շարունակական բնույթ կկրեն և հետագայում սեմինարներ կանցկացվեն նաև Հայաստանի այլ մարզերում:ՀՀ կենտրոնական բանկի ֆինանսական կրթման թիմը ողջունում է կրթական ծրագրերին աջակից դառնալու ձեր ցանկությունը: Մենք արժևորում ենք ձեր տաղանդն ու ժամանակը և ուրախ կլինենք տեսնել ձեզ մեր կամավորների շարքում։