Արի պատմենք, թե ինչպես կարող ես հարազատիդ մահից հետո տեղեկություն ստանալ նրա կենսաթոշակային փայերի մասին և հնարավորության դեպքում ժառանգել:

Կենսաթոշակային փայերը կուտակային կենսաթոշակային համակարգի շնորհիվ կուտակված միջոցներն են:

Մահվանը հաջորդող 6 ամիսների ընթացքում անհրաժեշտ է ժառանգության հարցով դիմել հարազատիդ բնակության վայրի նոտարին: Կարևոր է նշել, որ նոտարը նաև կենսաթոշակային փայերի վերաբերյալ հարցում անի Հայաստանի կենտրոնական դեպոզիտարիային:

Բացի ունեցվածքի վերաբերյալ հարցումներից նոտարը հարցման միջոցով պարզելու է, թե արդյոք քեզնից բացի կան այլ ժառանգներ:

Հարցումներն իրականացնելուց հետո նա քեզ կտրամադրի ժառանգության վկայագիրը, սովորաբար այս փուլը տևում է 6 ամիս:

Ժառանգության վկայագիրը ստանալուն պես կարող ես դիմել Կենտրոնական դեպոզիտարիային հաշվի օպերատորներից որևէ մեկի միջոցով: Կախված քո ընտրությունից՝ կենսաթոշակային փայերը կփոխանցվեն քո անհատական կենսաթոշակային հաշվին, կամ էլ միանվագ կվճարվեն՝ փոխանցվելով քո կողմից նշված բանկային հաշվին:

Նշենք, որ միանվագ ստանալու դեպքում քեզնից գանձվելու է ժառանգվելիք կենսաթոշակային փայերի 2 %-ի չափով գումար: Իսկ առաջին տարբերակն ընտրելու դեպքում հարազատիդ կուտակային փայերն ավելանալու են քոնին և  արդյունքում ավելի բարձր կենսաթոշակ են քեզ ապահովելու:

Դիմումդ ստանալուց հետո 10 աշխատանքային օրերի ընթացքում Հայաստանի կենտրոնական դեպոզիտարիան կազմակերպելու է կուտակված կենսաթոշակային փայերի ժառանգումը:

Կարող ես նաև որևէ մեկին լիազորել, որպեսզի քո փոխարեն ներկայացնի կենսաթոշակային փայերի ժառանգման դիմում:

Դիմում ներկայացնելիս անհրաժեշտ է տրամադրել այս տվյալներն ու փաստաթղթերը՝

1)     ժառանգի անունը և ազգանունը, անձը հաստատող փաստաթղթի սերիան (առկայության դեպքում) և համարը.

2)    ժառանգի հանրային ծառայության համարանիշը կամ հանրային ծառայության համարանիշ չունենալու մասին տեղեկանքի համարը, բացառությամբ այն դեպքի, երբ անձը օտարերկրյա քաղաքացի է և կուտակային կենսաթոշակային համակարգի մասնակից չէ.

3)    ժառանգի կոնտակտային տվյալները (հեռախոսահամարը, էլ. փոստի հասցեն և այլն).

4)    ժառանգի՝ Կենտրոնական դեպոզիտարիայից տեղեկատվություն ստանալու նախընտրելի միջոցը (նամակ, էլեկտրոնային հաղորդագրություն և այլն).

5)    ժառանգատուի անունը և ազգանունը.

6)   ժառանգատուի հանրային ծառայության համարանիշը կամ հանրային ծառայության համարանիշ չունենալու մասին տեղեկանքի համարը.

7)    կենսաթոշակային ֆոնդի ժառանգված փայերի ժառանգման տարբերակի և չափի (յուրաքանչյուր տարբերակի գծով) վերաբերյալ ժառանգի ընտրությունը.

8)   անհատական բանկային հաշվի տվյալները, եթե ընտրել ես միանվագ ստանալու տարբերակը,

9)   ժառանգության վկայականի տվյալները

10) դիմումի ներկայացման տարին, ամիսը և ամսաթիվը.

11)  ժառանգի (ժառանգի լիազոր ներկայացուցչի) ստորագրությունը, բացառությամբ այն դեպքերի, երբ դիմումը ներկայացվել է էլեկտրոնային եղանակով, որն ապահովում է անձի նույնականացումը: